Kerala

പടക്കം പൊട്ടിക്കുന്നതിനെ ചൊല്ലി തർക്കം;മർദ്ദനം,ജാതി പറഞ്ഞ് ആക്ഷേപം,മനംനൊന്ത് യുവതി ആത്മഹത്യക്ക് ശ്രമിച്ചു;ബിജെപി നേതാക്കള്‍ക്ക് എതിരെ പോലീസ് കേസ്

കോട്ടയം: ജാതി പറഞ്ഞ് ആക്ഷേപിച്ചതിന് ബിജെപി പഞ്ചായത്ത് പ്രസിഡന്റിനെതിരെ കേസ്.ക്രിസ്മസ് ആഘോഷത്തെ തുടര്‍ന്നുണ്ടായ സംഘര്‍ഷത്തിലാണ് പഞ്ചായത്ത് പ്രസിഡന്റ് ആശാ ഗിരീഷിന് എതിരെ കേസ് രജിസ്റ്റർ ചെയ്തിരിക്കുന്നത്. കോട്ടയം ജില്ലയിലെ പള്ളിക്കത്തോട് പഞ്ചായത്ത് പ്രസിഡന്റ് ആണ് ആശാ.

പള്ളിക്കത്തോട് ഗ്രാമ പഞ്ചായത്തിലെ രണ്ടാം വാര്‍ഡ് മുന്‍ മെമ്പറുടെ വീട്ടില്‍ ക്രിസ്മസ് ദിനത്തില്‍ പടക്കം പൊട്ടിച്ചതിനെ ചൊല്ലിയുണ്ടായ തര്‍ക്കമാണ് സംഘര്‍ഷത്തിലേക്ക് എത്തിയത്. മുന്‍ മെമ്പര്‍ ആയ രമാദേവി രാമചന്ദ്രന്റെ മകന്‍ അനൂപ് ചന്ദ്രനും മൂന്ന് സുഹൃത്തുക്കളുമാണ് പടക്കം പൊട്ടിച്ചത്. ഇതിനെതിരെ ആശ ഗിരീഷിന്റെ നേതൃത്വത്തില്‍ ബിജെപി പ്രവര്‍ത്തകര്‍ ശബ്ദ മലിനീകരണം ആരോപിച്ചു കൂട്ടം കൂടുകയും പൊലീസില്‍ വിവരം അറിയിക്കുകയും ചെയ്തു.പൊലീസ് സ്ഥലത്തെത്തി 9.30 ഓടെ പടക്കം പൊട്ടിക്കുന്നത് നിർത്തണമെന്ന് ആവശ്യപ്പെട്ടു.

എന്നാല്‍ അനൂപ് ചന്ദ്രന്റെ സുഹൃത്തുക്കളായ മൂന്ന് പേര്‍ ഓട്ടോയില്‍ മടങ്ങും വഴി ബിജെപി പ്രവര്‍ത്തകര്‍ റോഡില്‍ തടഞ്ഞു നിര്‍ത്തി മര്‍ദിക്കുകയായിരുന്നെന്ന് പൊലീസിന് നൽകിയ പരാതിയിൽ പറയുന്നു. ഓട്ടോയിലുണ്ടായിരുന്ന പട്ടിക ജാതി വിഭാഗത്തില്‍പെട്ട സുഭാഷ് എന്ന ചെറുപ്പക്കാരനെ ജാതിപ്പേര് വിളിച്ച് ബിജെപി പ്രവർത്തകർ അധിക്ഷേപിക്കുകയും മര്‍ദിക്കുകയും ചെയ്‌തെന്ന് പരാതിയില്‍ പറയുന്നു.

ശബ്ദംകേട്ട് സംഭവസ്ഥലത്തേക്ക് എത്തിയ അനൂപ് ചന്ദ്രനും ഭാര്യ രേണുവിനെതിരെയും ബിജെപിക്കാർ കയ്യേറ്റ ശ്രമമുണ്ടായെന്ന് കുടുംബം പറയുന്നു.ഇരുപതോളം വരുന്ന ബിജെപി പ്രവര്‍ത്തകരുടെ മുന്‍പില്‍ വച്ച് ആശാ ഗിരീഷ് രേണുവിനോട് മോശം ഭാഷയില്‍ സംസാരിക്കുകയും തെറി വിളിക്കുകയും ചെയ്തു എന്നാരോപിച്ചു രേണു ഉറക്കഗുളിക കഴിച്ച് ആത്മഹത്യക്ക് ശ്രമിച്ചു.തുടർന്ന് ഇവരെ ചേര്‍പ്പുങ്കല്‍ മെഡിസിറ്റി യില്‍ ചികിത്സയില്‍ പ്രവേശിപ്പിച്ചു.ജാതി വിളിച്ച് ആക്ഷേപിച്ചു എന്ന പരാതിയില്‍ പൊലീസ് കേസെടുത്ത് അന്വേഷണം ആരംഭിച്ചതായി കാഞ്ഞിരപ്പള്ളി ഡിവൈഎസ്പി വ്യക്തമാക്കി.

കൂടുതൽ വാർത്തകൾക്കായി ഞങ്ങളുടെ വാട്ട്സ്ആപ്പ് ഗ്രൂപ്പിൽ അംഗമാകുക. https://chat.whatsapp.com/GRjisVP0wcc54M4TWGyo56

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

Leave a Reply

Your email address will not be published. Required fields are marked *