Kerala

നിയമസഭാ തെരഞ്ഞെടുപ്പ്;മന്ത്രിമാർ മല്‍സരിച്ചേക്കില്ല,യുവാക്കളെ അണിനിരത്താനൊരുങ്ങി സിപിഐ

തിരുവനന്തപുരം: സംസ്ഥാനത്ത് വരാനിരിക്കുന്ന നിയമസഭ തെരഞ്ഞെടുപ്പിലെ സ്ഥാനാർത്ഥി ചർച്ചകൾ സജീവമാക്കി രാഷ്ട്രീയപാർട്ടികൾ. തെരഞ്ഞെടുപ്പിൽ സിപിഐ മന്ത്രിമാർ ആരും മത്സരിക്കാൻ സാധ്യതയില്ല. രണ്ടുതവണ തിരഞ്ഞെടുപ്പിൽ വിജയിച്ചവർ മത്സരിക്കേണ്ടെന്ന പൊതുനയം കർശനമായി നടപ്പാക്കുകയാണെങ്കിൽ മന്ത്രിമാരായ ഇ ചന്ദ്രശേഖരൻ, വിഎസ് സുനിൽകുമാർ, കെ രാജു, പി തിലോത്തമൻ എന്നിവർക്ക് സീറ്റ് കിട്ടുകയില്ല.

ഇവരെ കൂടാതെ എംഎൽഎമാരായ സി ദിവാകരൻ, ഇ എസ് ബിജിമോൾ, മുല്ലക്കര രത്‌നാകരൻ, ജി എസ് ജയലാൽ, ഇ കെ വിജയൻ, ഗീതാ ഗോപി, ചിറ്റയം ഗോപകുമാർ, വി ശശി എന്നിവരും ഒഴിവാക്കപ്പെട്ടേക്കും. കഴിഞ്ഞ തവണ സി ദിവാകരൻ, വി എസ് സുനിൽ കുമാർ, മുല്ലക്കര രത്‌നാകരൻ, ബിജിമോൾ എന്നിവർക്ക് രണ്ടു ടേം നിബന്ധനയിൽ ഇളവ് അനുവദിച്ചിരുന്നു.

സീനിയോറിറ്റിയും ജയസാധ്യതയും കൂടി പരിഗണിച്ച് ഈ നിബന്ധനയിൽ ഇളവ് അനുവദിക്കാറുണ്ട്. മറ്റുമന്ത്രിമാർ എംഎൽഎയായി മൂന്ന് ടേം കഴിഞ്ഞവരായതിനാൽ രണ്ട് ടേം മാത്രമിരുന്ന ഇ ചന്ദ്രശേഖരന് ഒരവസരംകൂടി ലഭിച്ചേക്കാം. മുതിർന്ന നേതാക്കൾ കൂട്ടത്തോടെ മൽസരരംഗത്തു നിന്നും മാറിയാൽ പുതുമുഖങ്ങൾക്ക് ഏറെ അവസരങ്ങൾ ലഭിക്കും.

ഇതുവഴി യുവജനനേതാക്കൾക്കായിരിക്കും കൂടുതൽ പരിഗണന ലഭിക്കുക. എഐഎസ്എഫ്., എഐവൈഎഫ് നേതാക്കളായിരുന്ന ശുഭേഷ് സുധാകർ, ജിസ്‌മോൻ, മഹേഷ് കക്കത്ത് തുടങ്ങിയവർക്ക് സാധ്യതയുണ്ട്.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

Leave a Reply

Your email address will not be published. Required fields are marked *